It’s A Mens World — Bebang Siy
Katulad ng marami na sinubukang sumisid sa alindog ng librong ito, isa rin ako sa mga nagsikunot ng noo’t nagsitaas ng kilay sa titulo nito. Sa unang tingin kasi, aakalain mo talagang nagkaroon ng isang matinding pagkakamali sa pagkaka-imprenta ng suklob nito. It’s a Mens World—hindi ba’t kulang ng kudlit? Isa pa, ang pangunahing pumasok kasi sa isipan ko pagkabasa nito ay ang isang tagpo sa American TV series na Glee, iyong parteng nagdadalang-tao si Quinn Fabray at kinanta iyong It’s a Man’s Man’s World (with matching preggy back-up dancers) na waring nagngingitngit sa galit at kinokondena ang mga kalalakihan. Sa madaling salita, inaasahan kong ang nilalaman ng librong ito ay patungkol sa peminismo, lalo pa’t ang awtor ay isang babae rin.
Ngunit sa oras na buklatin ang libro’t mapagawi sa unang sanaysay, aha, iyon na. Kaya naman pala.
Hindi rin naman pala nalalayo sa inaasahan ko ang librong ito. Sentro man ng buhay ng awtor ang kinukwento, ipinapakita rito ang natural na kalakasan ng mga babae—hindi iyong kalakasan na naikabit na sa imahe ng mga lalaki, ngunit ang kalakasang maimamanipesta lamang ng mga desendyente ni Eba.
Lumulutang sa bawat pahina ang katapatan at katapangan ng manunulat. May mga nakapaloob rin ditong ilang seryosong isyung kinakaharap ng marami sa ating mga babae na binudburan naman ng katatawanan at kalokohan ng pilyang si Bb. Bebang Siy. Maiikli lamang ang bawat sanaysay ngunit maaabot mo ng todo-todo ang nais nitong ipahiwatig sapagkat gumamit ang awtor ng epektibong paraan ng pagsasadula—ito iyong parang magkakilala lang kayo’t nagtsitismisan sa isang tabi. Walang magagarang salita, natural ang agos ng pagkakwento.
Isa ring inspirasyon ang librong ito. Ilang beses mang bumagsak ang awtor sa mahigpit na pagkakakapit sa buhay na inaasam-asam, heto siya’t patuloy na tumatayo upang magkaroon ng pagbabago. Animo’y isang gusgusing bata na nakikipaghabulan lamang sa mga tulad ding gusgusin ang dating imahen ng awtor. Kay drama-drama ng pinanggalingang pamilya at akalain mo iyon, kinidnap pa ng sariling tatay (?). Ngayon, aba’t nakapagsulat at nakapaglimbag pa ng libro!
Isang nakakatuwa, nakalilibang, ngunit matagumpay na paglalakbay mula kamuwangan patungong kaganapan.
P.S. Ano na kayang nangyari kay Michael? 😀
Rating: ★★★✰✰
Down The Book Cubbyhole 